Isa 3 | NdeIBE | STEP | Khangelani khathesi uJehova, uJehova uSomandla usezasusa eJerusalema lelizweni lakoJuda okufunekayo losizo: konke ukudla lamanzi,

Isaiah 3

Ukwahlulelwa kweJerusalema Lelizwe lakoJuda

1 Khangelani khathesi uJehova, uJehova uSomandla usezasusa eJerusalema lelizweni lakoJuda okufunekayo losizo: konke ukudla lamanzi,

2 iqhawe lebutho, umahluleli lomphristi isangoma lomuntu omdala,

3 induna yebutho labangamatshumi amahlanu lamadoda ayizikhulu, umeluleki, ingcitshi yemisebenzi, lesanuse esihlakaniphileyo.

4 Ngizakwenza abafana babe yizikhulu zabo; abantwana nje bazababusa.

5 Abantu bazacindezelana umuntu avukele umuntu, umakhelwane avukele umakhelwana. Abatsha bazavukela abadala, abeyisekayo bavukele abahlonitshwa.

6 Indododa izabamba omunye wabafowabo emzini kayise ithi, “Ulesambatho, woba ngumkhokheli wethu, inqwaba yamanxiwa le izakuba ngaphansi kombuso wakho.”

7 Kodwa ngalolosuku uzakhala athi, “Angilamasiza. Endlini yami akulakudla loba izigqoko; ungangenzi umkhokheli wabantu.”

8 IJerusalema liyadiyazela, uJuda uyawa; amazwi abo lezenzo zabo kuphambene loJehova, kweyisa ubukhona bakhe bobukhosi.

9 Ukukhangeleka kobuso babo kufakaza kubi ngabo; babukisa izono zabo njengeSodoma; kabazifihli. Maye kubo! Bazilethele incithakalo phezu kwabo.

10 Tshela abalungileyo ukuthi kuzakuba kuhle kubo, ngoba bazakholisa izithelo zezenzo zabo.

11 Maye kwababi! Incithakalo isiphezu kwabo! Bazaphindiselwa ngalokho izandla zabo ezikwenzileyo.

12 Abatsha bacindezela abantu bami, abesifazana bayababusa. Awu, bantu bami, abakhokheli benu bayaliduhisa; bayaliphambula endleleni.

13 UJehova uphakama ukuba afakaze indaba yakhe, uyasukuma ukuba ahlulele abantu.

14 UJehova uqalisa ukwahlulela abadala labakhokheli babantu esithi, “Yini elitshabalalise isivini sami; elikuthumbe kubayanga kusezindlini zenu.

15 Litshoni ngokuchoboza abantu bami langokuchola ubuso babayanga?” kutsho uJehova, uJehova uSomandla.

16 UJehova uthi, “Abesifazana baseZiyoni bayaziphakamisa, bahamba belule izintamo, behuga ngamehlo abo, begwenxeka ngamanyathelo amancane, izigqizo zikhencezela ezinqagaleni zabo.

17 Ngakho-ke uJehova uzakwenza amakhanda abesifazana baseZiyoni abe lezilonda; uJehova uzakwenza isikhumba samakhanda abo siphucuke.

18 Ngalolosuku uJehova uzahluthuna imiceciso yabo: amasongo, imincwazi, lemigaxo yentanyeni,

19 amacici, izigqizo lezimbombozo, 20 amaqhiye, izigetsho lamabhanti; izimbodlela zamakha lezintebe,

21 izindandatho ezilophawu lamasongo empumulo,

22 izambatho ezinhle lezingubo lezigqoko, izikhwama

23 lezibuko, lezigqoko zelineni, imiqhele lamaveli.

24 Ekubeni kube lephunga elimnandi kuzakuba lomnuko omubi; ekubeni kube lebhanti kuzakuba legoda, ekubeni kube lenwele ezilungiswe kuhle kuzakuba lempabanga, ekubeni kube yizigqoko ezinhle kuzakuba ngamasaka, ekubeni kube yibuhle, kuzakuba lihlazo.

25 Amadoda akini azakuwa ngenkemba, kanjalo lamabutho akini empini.

26 Amasango aseZiyoni azakhala alile, kuthi yona ihlale phansi ichithekile.